TXIF — mamlakatning asosiy xalqaro iqtisodiy tadbiri bo‘lib, O‘zbekistonning jadal rivojlanishida muhim rol o‘ynaydigan ishtirokchilarni, jumladan, hukumat, biznes vakillari va yirik xalqaro investorlarni birlashtiradi. TBC Uzbekistan mamlakat iqtisodiyotiga uzoq muddatli sarmoya kiritayotgan investor sifatida forumning ishbilarmonlik dasturida faol qatnashadi va raqamli moliyaviy ekotizimni rivojlantirish borasidagi tajribasi bilan oʻrtoqlashadi. Ekotizim vakillari Markaziy Osiyoda raqamli transformatsiya, moliyaviy innovatsiyalar, sun’iy intellekt va moliyaviy xizmatlar kelajagiga bag‘ishlangan muhokamalarda ishtirok etadilar. Shuningdek, mamlakatga xalqaro investitsiyalarni jalb etishning ahamiyati ham alohida taʼkidlanadi.

17-iyun kuni aksiyalari London fond birjasida kotirovka qilingan TBC Bank Group bosh direktori Vaxtang Butsxrikidze O‘zbekiston Respublikasi Prezidenti huzuridagi Xorijiy investorlar kengashi va EY hamkorligida tashkil etiladigan yopiq biznes-nonushtada ishtirok etadi. Uchrashuv davomida sun’iy intellektdan mehnat unumdorligini oshirish vositasi sifatida foydalanish, shuningdek, O‘zbekistonning kelajakdagi raqobatbardoshligini ta’minlash uchun zarur bo‘lgan ustuvor yo‘nalishlar muhokama qilinadi.

Keyingi kuni TBC Digital kuzatuv kengashi raisi Oliver Hyuz “Keng ko‘lamli o‘sish: TBC Uzbekistan rivojlanishining navbatdagi bosqichi” mavzusidagi Fireside chat sessiyasida ishtirok etadi. Muhokama davomida u ekotizimni rivojlantirish tajribasi bilan o‘rtoqlashadi hamda mintaqaning yetakchi raqamli moliyaviy platformalaridan birining kelgusi rivojlanish rejalari haqida so‘z yuritadi. 

“Toshkent xalqaro investitsiya forumi O‘zbekiston uchun muhim voqea bo‘lib, mamlakatning jadal iqtisodiy o‘sishi fonida global ishbilarmonlik kun tartibida tobora muhim ahamiyat kasb etmoqda. 2020-yildan beri TBC O‘zbekiston iqtisodiyotini rivojlantirishda muhim rol o‘ynamoqda, keng ko‘lamli islohotlar investitsiyalarni rag‘batlantirayotgani, xususiy sektorni mustahkamlayotgani hamda makroiqtisodiy barqarorlikni qo‘llab-quvvatlayotganiga guvoh bo‘lmoqda. Ana shunday qulay muhitda biz Markaziy Osiyoning raqamli moliyaviy ekotizimini rivojlantirib, moliyaviy xizmatlarni o‘n millionlab foydalanuvchilar uchun yanada sodda va qulay qilmoqdamiz. TXIF hamkori sifatida yana bir bor ishtirok etayotganimizdan va O‘zbekistonning investitsiyaviy salohiyatini yanada kengroq namoyon etishga o‘z hissamizni qo‘shishdan mamnunmiz”, — deya ta’kidladi TBC Digital kuzatuv kengashi raisi Oliver Hyuz. 

Shuningdek, TBC Uzbekistan Xorijiy investorlar kengashi hamda O‘zbekistondagi The Coca-Cola Company hamkorligida ilk bor tashkil etilayotgan ESG mukofotlarini topshirish marosimida ishtirok etadi. Mazkur mukofot mamlakatning barqaror va inklyuziv rivojlanishiga munosib hissa qo‘shayotgan yetakchi xalqaro investorlarni e’tirof etishga qaratilgan. Marosim davomida xususiy sektor O‘zbekistonning ijtimoiy-iqtisodiy taraqqiyotiga qanday hissa qo‘shishi va mamlakatning izchil rivojlanishini qanday qo‘llab-quvvatlashi namoyish etiladi. Bu esa ekotizimning mas’uliyatli o‘sish, moliyaviy inklyuziya va innovatsiyalar tamoyillariga sodiqligini yana bir bor tasdiqlaydi.