Qarindoshim uchun kredit olish to‘g‘rimi?
Nataly Fein
Farruxga bankdan kredit berishmadi va u opasidan kreditni o‘z nomiga rasmiylashtirib berishini so‘radi. Vaqtida to‘lashga va’da berdi, ammo bir necha oydan so‘ng g‘oyib bo‘ldi va pul o‘tkazishni to‘xtatdi. Endi esa opasi qarz, foiz va jarimalarni to‘lashga majbur bo‘lmoqda. Hatto eng yaqin qarindosh uchun ham kredit olishga rozi bo‘lmaslik kerak — nima uchunligini tushuntirdik.
Qarindosh deb ishonib ketish to‘g‘ri emas
Agar qarindoshingiz o‘z nomiga kredit olishni xohlamasa, buning turli xil sabablari bo‘lishi mumkin. Masalan, yomon kredit tarixi, boshqa qarzlar yoki mas’uliyatdan qochish. Nega aynan sizdan so‘rayotganini ochiqchasiga so‘rang — bu sizga to‘g‘ri qaror qilishda yordam beradi.
Kredit tarixingizga putur yetadi
Agar qarindoshingizdan pul kutayotgan bo‘lsangiz-u, u to‘lovni kechiktirsa, bank sizga jarima soladi va qarzni hisobingizdan yechishni boshlaydi. Hujjatlarga ko‘ra, to‘lovni aynan siz amalga oshirishingiz kerak. Keyinchalik o‘zingizga kredit kerak bo‘lsa, rad javobini olishingiz mumkin.
Yangi kredit olish qiyinlashadi
O‘zingizga yangi kredit kerak bo‘lib qolsa, bank sizda qarz borligini ko‘rib, sizga yangi kredit bermasligi mumkin.
“Yo‘q” deyish va xafa qilmaslik yo‘li bormi?
Ochiqchasiga bunday mas’uliyatni o‘z zimmangizga olishga tayyor emasligingizni ayting. Boshqa yo‘l bilan yordam taklif qiling — maslahat bering yoki boshqa yechim topishga ko‘maklashing. Balki keraksiz xarajatlardan voz kechish haqida gaplashish foydaliroqdir.
Kredit rasmiylashtirishdan oldin yaxshilab o‘ylab ko‘ring
Yaqin insoningizga “yo‘q” deyish oson emas. Lekin esda tuting: agar biror narsa noto‘g‘ri ketsa, qarz, foiz va jarimalar sizning bo‘yningizda qoladi. Og‘zaki va’dalar esa hech qanday huquqiy kuchga ega emas.